Ռիօ-Անդիռիօ կամուրջ

Ռիօ-Անդիռիօ կամուրջ (յուն․՝ Γέφυρα Ρίου – Αντιρρίου) եւ կամ պաշտօնապէս անուանուած «Խարիլաոս Թրիքուփիս» կամուրջ. կայմապարան կամուրջ որուն կառուցման աշխատանքները կը վերջանան 2004-ի ամրան։ Կարեւոր խաչմերուկ մը, որ Պեղոպոնեզը Πελοπόννησος եւ Ատիկէն Αττική կը կապէ Յունաստանի մայր ցամաքամասի արեւմտեան մասին՝ Կեդրոնական Յունաստանի արեւմտեան բաժին եւ Իփիրոս։

  • Անդիռիօ․ կը նշանակէ Ռիոյին դիմացի կողմը
Ռիօ-Անդիրիօ կայմապարան կամուրջը, նկարուած Փաթրայի Համալսարանէն, Ռիօ, 8-10-2008

Ռիօ-Անդիռիօ երթեւեկութեան կամուրջը, մաս կը կազմէ Յոնիան Մայրուղիին (Α5) եւ Եւրոպական Մայրուղիին (Ε55)։ Կ՛ ընդգրկէ նաեւ մայթուղի եւ հեծիկներու համար վազքուղի։

ԴիրքըԽմբագրել

 
Ռիօ-Անդիրիօ կամուրջին օդային լուսանկարը․ արեւմուտքին (նկարին հիւսիսը) Փաթրայի Ծոցը եւ արեւելքին (նկարին հարաւը) Կորնթոսի Ծոցը։
 
Ռիօ-Անդիռիօ կամուրջին դիրքը

Կամուրջը կը գտնուի Ռիօ Նեղուցին վրայ եւ իրարու կը կապէ իր երկու ծայրերուն գտնուող՝ Ռիօ քաղաքը (Պեղոպոնեզ) եւ Անդիռիօ գիւղը (Էթոլոաքարնանիա)։ Կամուրջին արեւելեան կողմը կը գտնուի Կորնթոսի Ծոցը, իսկ արեւմտեան՝ Փաթրայի Ծոցը։

ՊատմութիւնԽմբագրել

1880-ին Յունաստանի վարչապետ Խարիլաոս Թրիքուփիս, առաջիններէն է որ Ռիօ նեղուցին վրայ երկաթգծային կամուրջի մը կառուցման ցնորատեսութիւնը կ՛ ունենայ, Կորնթոսի Ջրանցքին կառուցման աշխատանքներուն ընթացքին։

3 Յունուար, 1996-ին կամուրջին ճարտարապետական աշխատանքները կ՛ իրագործուին յունա-ֆրանսական ընկերակցութեան կողմէ, զոր կը գլխաւորէ ֆրանսական «Vinci» ընկերութիւնը։ Ընկերակցութեան մաս կը կազմեն յունական շինարարական ու ճարտարագիտական ընկերութիւններ․«ΤΕΒ», «J&P-ΑΒΑΞ», «Αθηνά», «Προοδευτική» եւ «Παντεχνική»։ Կամուրջին կառուցման աշխատանքները կը գլխաւորէ հայազգի ճարտարապետ՝ Պերճ Միքայէլեան։ 1999-ին կը սկսին կառուցման բարդ աշխատանքները։

7 Օգոստոս, 2004-ին, կամուրջին պաշտօնական բացումը տեղի կ՛ ունենայ եւ 12 Օգոստոս 2004-ին կամուրջը հանրութեան կը յանձնուի․ Աթէնքի ողիմպիական խաղերուն բացումէն մէկ օր առաջ։

«Խարիլաոս Թրիքուփիս» անուանումԽմբագրել

 
Փաթրայի համալսարանի համալիրը, Ռիօ-Անդիրիօ կամուրջը եւ դիմացը Անդիռիօն․ կամուրջին արեւմուքին Փաթրայի Ծոցը, իսկ արեւելքին Կորնթոսի Ծոցը
 
Ռիօ-Անդիռիօ կամուրջը վերջալոյսին

25 Մայիս, 2007-ին, կամուրջին կառուցման ընկերակցութեան վարչական շէնքին մէջ, բացառիկ հանդիսութեամբ մը Յունաստանի Հանրապետութեան նախագահ Քարոլոս Փափուլիաս Ռիօ-Անդիռիօ կայմապարան կամուրջը կ՛ անուանէ «Խարիլաոս Թրիքուփիս», որովհետեւ ԺԹ․ դարու Յունաստանի վարչապետ Խարիլաոս Թրիքուփիս երկաթգծային կամուրջի մը ցնորատեսութիւնը ունեցած էր։ Սակայն այդ ժամանակին, Յունաստանի տնտեսական պայմանները չէին ներեր նման կամուրջի մը կառուցումը։

ՆկարագրութիւնԽմբագրել

Կայմապարան կամուրջը կը յենուի չորս սիւներու վրայ եւ երկարութիւնն է 2․252 մ․ իսկ երկու անցուղիներով միասին՝ 2․883 մեթր։ Լայնութիւնն է 27.2 մ․։ Երկու անցուղիներն են՝

  • Հարաւէն Ռիօ
  • Հիւսիսէն Անդիռիօ

Կամուրջին հիմքերը պառկած են ծովուն յատակը 700 մ․ ծովային ժայռոտ խորքի վրայ։ Կամուրջին հիմքերուն խորութիւնը ծովու մակերեսէն 65 մ․կը հասնի։ Շրջանը ենթակայ ըլլալով զօրաւոր քամիներու եւ երկրաշարժի յաճախակի ցնցումներու՝ որոնք Եւրոպայի ամենաշխուժներէն են, նախագծուած է որպէսզի դիմանայ՝

  • Երկրաշարժի մինչեւ 8 ռիխթըր ուժգնութեամբ ցնցումներուն․ շրջանին մէջ վերջին զօրաւոր ցնցումը 6,3 ուժգնութեամբ տեղի ունեցաւ 15 Յունիս 1995-ին։
  • Զօրաւոր քամիներուն, որոնք հար ու նման են արեւադարձային կիկլոններու հարուածներուն․ միջին հաշուով՝ ըստ Բրիտանական չափանիշներուն, 5-րդ Կարգի կիկլոն, այսինքն կամրջակի մակերեսին վրայ քամիի 265 քմ․/ժ արագութեան՝ «Սաֆիր Սիմսոն աստիճան» Saffir–Simpson scale (SSHS):

Կամուրջը կառուցուած է այնպէս որ մայր ցամաքէն տարեկան 35 մմ. հեռացող Պեղոպոնեզ (Փելոփոնէս) թերակղզիին հետ «շարժելու» հնարաւորութիւնը ունենայ։

 
Ռիօ-Անդիռիօ կամուրջին նախագիծը

[1] [2] [3] [4] [5] [6] [7] [8] [9]

Տե՛ս նաեւԽմբագրել

Փաթրա

Փաթրայի Ծոց

Կորնթոսի Նեղուցը

Կորնթոսի Ծոցը

Կորնթոսի Ջրանցքը

Կորնթոս

Յոնիական Ծով

Յոնիական կղզիներ

ԾանօթագրութիւններԽմբագրել

Արտաքին յղումներԽմբագրել

  1. Սաֆիր Սիմսոն աստիճան(անգլերէն)
  2. Ռիխթըր երկրաշարժի ուժգնութեան չափ(անգլերէն)
  3. Ռիօ-Անդիրիօ կամուրջին նկարները երկինքէն(յուն.)
  4. Խարիլաոս Թրիքուփիս(ֆր.)
  5. Ռիօ-Անդիրիօ կամուրջը իրիկունը լուսաւորուած
  6. patrasevents - 13 տարի Ռիօ-Անդիռիօ կամուրջ․ կը ներփակէ բացումէն տեսերիզ , 7-10-2017(յուն.)