Միքայէլ Յակոբեան
Միքայէլ Յակոբեան (10 Մարտ 1925 - Նոյեմբեր 1983), խմբագիր։
| Միքայէլ Յակոբեան | |
|---|---|
| Ծնած է | 10 Մարտ 1925 |
| Ծննդավայր | Արծուանիկ գիւղ |
| Մահացած է | Նոյեմբեր 1983 |
Կենսագրութիւն Խմբագրել
Միքայէլ Նաւասարդի Յակոբեան ծնած է Արծուանիկ գիւղ (ՀՍԱՀ-ի Ղափանի շրջան), 10 Մարտ 1925-ին։ Կը բռնկի Համաշխարհային Բ․ Պատերազմը, եւ ինք հազիւ միջնակարգ ուսումը աւարտած՝ 1943 թ․ին կը մեկնի ճակատ, ու կը մասնակցի Ղրիմի ու Սեւաստապոլի կռիւներուն։ Կը զօրացրուի 1945 թ․ին։ 1947-1949 ուն կը վարէ Ղափանի «Պղինձի Համար» թերթի գրական աշխատողի, եւ ապա՝ պատասխանատու քարտուղարի պաշտօնը։ Ուսումը կատարելագործելու համար մուտք կը գործէ Երեւանի Պետական համալսարան, որուն Բանասիրական Բաժանմունքի Լրագիտական Ամբիոնի դասընթացքը կ՚աւարտէ 1954 թ․ին։ 1959-1961 ուն՝ մասնագիտական ուսման համար կը հետեւի Գիտութիւններու Ակադեմիայի ասպիրանդականի դասընթացքներուն։ 1974 թ․ին՝ պաշտպանելէ ետք «Գրիգոր Մսրեանը եւ Նրա «Մէտէօրա» Հանդէսը Հայ Լուսաւորական-Դեմոկրատական Շարժման Մէջ» խորագրով աւարտաճառը, կը ստանայ Բանասիրական Գիտութիւններու Թեկնածու աստիճանը[1]։
Աշխատութիւններ Խմբագրել
Մ․ Յակոբեան երկար տարիներ կը վարէ մէկէ աւելի խմբագրական պաշտօններ։ Դեռ ուսանողական տարիներուն՝ 1952-1954 ուն, ան կը խմբագրէ «Սովետական Ուսանողութիւն» թերթը։ 1955-1957 ուն՝ յաջորդաբար կը ստանձնէ «Աւանգարգ»ի բաժնի վարիչի պատասխանատու քարտուղարի եւ խմբագրի տեղակալի պաշտօնները, իսկ 1957-1959 թթ․ուն՝ «Առողջապահութիւն» ամսաթերթի պատասխանատու քարտուղարութիւնը։ 1962-1965 ուն՝ կը վարէ ԳԱ «Տեղեկագիր Հասարակական Գիտութիւնների» ամսագրի, իսկ 1965 -1966 ուն՝ «Սովետական Հանրագիտարան»ի պատասխանատու քարտուղարի, եւ ապա՝ աւագ գիտաշխատողի պաշտօնները։ 1969 - 1973 թթ․ուն՝ «Լրաբեր Հասարակական Գիտութիւնների» ամսագրի պատասխանատու քարտուղարն է ան, իսկ 1973 թ․էն մինչեւ իր կեանքի վերջին օրերը՝ ԳԱ Պատմութեան Ինստիտուտի մէջ աւագ գիտաշխատող։
Խմբագրական պատասխանատու պաշտօններու զուգահեռ՝ Մ․ Յակոբեան կը մշակէ գեղարուեստական արձակը, միաժամանակ գիտական հետաքրքրութիւն ցուցաբերելով հայ մամուլի պատմութեան հանդէպ։ Այս գծով՝ Հայագիտական մամուլի եւ «Հայկական Սովետական Հանրագիտարան»ի էջերուն մէջ իր ստորագրած բազմաթիւ ուսումնասիրութիւններէն ու յօդուածներէն անկախ, առանձին հատորով կը հրատարակէ «Մէտէօրա» Հանդէսը Արեւմտահայ Լուսաւորական-Դեմոկրատական Շարժման Մէջ (Երեւան, 1977), եւ Զմիւռնահայ Պարբերական Մամուլը 1839 - 1860 (Երեւան, 1980) աշխատասիրութիւնները։ Իսկ կնոջ՝ Ժենիա Ծերունեանի հեղինակցութեամբ կը պատրաստէ նաեւ Ստեփան Ոսկանի «Արեւելք» (1855 - 1856) եւ «Արեւմուտք» (1859. 1864 - 1865) (Երեւան, 1980), եւ «Ծաղիկ» (1861 - 1867) Հանդէսի Մատենագիտութիւն (Երեւան, 1983) ծանօթագրուած մատենագիտական հատորները։ Իրմէ անտիպ կը մնայ Ստեփան Ոսկան մենագրութիւնը։
Մ․ Յակոբեան կը մահանայ Նոյեմբեր 1983 թ․ին, Երեւան։
Աղբիւրներ Խմբագրել
- Հայկազեան Հայագիտական Հանդէս, խմբագիր Երուանդ Հ․ Քասունի, հատոր Ժ․, Պէյրութ, 1984, էջ 388-389։
Ծանօթագրութիւններ Խմբագրել
- ↑ «Վիեննայի մենաստանի մամուլի շտեմարան- ՄԷՏԷՕՐԱ»։ արտագրուած է՝ 2023-01-13