Հայկական Ծըւծըւուկ
Հայկական Ծըւծըւուկ, բուն ծըւծըւուկը (անգլ.՝ silane in flata) կը պատկանի մեխակազգիներու ընտանիքին։ Ունի ճերմակ ծաղիկներ՝ սափորանման սնամէջ բաժակի մը ծայրը։ Անոր ծաղիկներուն ծայրերը մատներու մէջ հաւաքած սեղմելով՝ ետեւի սափորանման բաժակը, որուն մէջ օդը բանտարկուած է, կարելի է բախել ճակատին ու «պայթեցնել»։ Պայթող բաժակը կը հանէ ճայթիւնի ձայն մը։
Սիմ-Հաճի-Գիւղացիք (Ամասիա) այս բոլորը կը կոչեն կաթնուկ, որուն նորաբողբոջ պարարտ տերեւները հում կ՛ուտեն մինչեւ գարնան ամպերուն առաջին գոռումը, որմէ ետք այլեւս չեն ուտեր զանոնք, որովհետեւ անձրեւի եղանակը սկսելու ժամանակ բոյսը արդէն բաւական աճած կ՛ըլլայ ու անոր տերեւները կորսնցուցած կ՛ըլլան իրենց փափկութիւնն ու դալար վիճակը։
Հայկական ծըւծըւուկը կ՛աճի հետեւեալ շրջաններուն մէջ. Կարին, Բաբերդ, Բիւրակնեան լեռներ, Կապադովկիա եւ Պարսկաստան։