Պօղոս Գէորգեան
| Պօղոս Գէորգեան | |
|---|---|
| Ծնած է | 1885-ին |
| Ծննդավայր | Պոլիս, Պէյօղլու թաղամաս |
| Մահացած է | 1979-ին |
| Քաղաքացիութիւն | Ֆրանսա |
| Ազգութիւն | Հայ |
| Կրօնք | Հայ Առաքելական եկեղեցի |
| Մասնագիտութիւն | հասարակագիտութեանց վկայական (licencié ès sciences sociales) |
| Աշխատավայր | ընդհանուր պատմութեան ուսուցիչ, «Դպրոցասէր» վարժարանին տնօրէն, Զուիցերիոյ Պէնիէնի (Begnins) հայկական որբանոց-վարժարանի տնօրէն, Կիպրոսի Մելգոնեան կրթական հաստատութեան մէջ ուսուցիչ ապա տնօրէն: |
| Ամուսին | Հերմինէ-Մաքրուհի Չիլինկիրեան (Պոլիս, 1904-ին - Փարիզ, 1989-ին) |
| Երեխաներ | Գոհարիկ (Ժընեւ, 1932- Փարիզ, 2014) եւ Գէորգ (1933-2006) |
Կենսագրութիւն Խմբագրել
Պօղոս Գէորգեան ծնած է 1885-ին, Պոլիս, Պէյօղլու թաղամաս։ Փոքր տարիքէն կը կորսնցնէ իր ծնողները եւ հասակ կը նետէ իր քոյրերուն խնմաքին տակ։ Կը յաճախէ Պոլսոյ Նարեկեան, Էսաեան, Մխիթարեան եւ Կեդրոնական վարժարանները։ Կեդրոնական վարժարանէն շրջանաւարտ կ՚ըլլայ 1908-ին։ Կը մեկնի Ժընեւ՝ համալսարանական ուսում ստանալու համար եւ 1912-ին այս քաղաքին մէջ կը ստանայ հասարակագիտութեանց վկայական (licencié ès sciences sociales)։ Նոյն տարին կը վերադառնայ Պոլիս, ուր կը սկսի մանկավարժութիւն եւ հոգեբանութիւն դասաւանդել «Նոր Դպրոց» եւ «Դպրոցասէր» վարժարաններուն մէջ։ 1915-էն սկսեալ ընդհանուր պատմութեան ուսուցիչ է Պոլսոյ Կեդրոնական վարժարանին մէջ։
1918-ին, Համաշխարհային պատերազմին աւարտէն ետք, կը ստանձնէ «Դպրոցասէր» վարժարանին տնօրէնութիւնը։ 1922-ին «Դպրոցասէր»ը կը փակուի, կը տեղափոխուի Յունաստան եւ հոնկէ ալ Ֆրանսա։ Պօղոս Գէորգեան նոյնպէս կը մեկնի Պոլիսէն եւ 1922-ին զինք կը գտնենք Զուիցերիա, ուր կը նշանակուի Պէնիէնի (Begnins) հայկական որբանոց-վարժարանի տնօրէն (Foyer arménien)։ Սոյն հաստատութիւնը հիմնուած էր զուիցերիացի հայասէր Անթոնի Քրաֆֆթ-Պոննարի կողմէ եւ կը գործէ 1921-էն 1934։ Գէորգեան հոս կը հիմնէ նաեւ հայկական փոքրիկ տպարան մը։ 1932-էն սկսեալ ուսուցչական պաշտօն կը վարէ Կիպրոսի Մելգոնեան կրթական հաստատութեան մէջ եւ 1935-ին կը նշանակուի նոյն հաստատութեան կրթական տեսուչ։ Գէորգեան Մելգոնեանի մէջ կը պաշտօնավարէ մինչեւ 1945[1]։
Ամուսնացած էր Հերմինէ-Մաքրուհի Չիլինկիրեանի հետ, որ ծնած էր Պոլիս, 1904-ին։ Կ՚ունենան երկու զաւակ. Գոհարիկ (Ժընեւ,1932- Փարիզ, 2014)[2] եւ Գէորգ (1933-2006)։ Պօղոս Գէորգեան կը մահանայ Փարիզ 1979-ին։ Կինը՝ Հերմինէ, կը մահանայ 1989-ին։
Հրատարակութիւն Խմբագրել
Պօղոս Գէորգեան հեղինակ է բազմաթիւ գիրքերու, հայերէն[3] եւ ֆրանսերէն, ընդհանրապէս մանկավարժական եւ կրթական նիւթերու մասին։