Նորայր Էլսայեան
Նորայր Էլսայեան (23 Օգոստոս 1934, Արաք, Իրան - 30 Մարտ 2021), իրանահայ վաստակաւոր ազգային-հասարակական եւ կրթական գործիչ, դաշնակցական գաղափարական նուիրեալ եւ Թեհրանի «Ալիք» օրաթերթի երկար տարիներու գլխաւոր խմբագիր[1]։
| Նորայր Էլսայեան Նորայր Էլսայեան | |
|---|---|
 | |
| Ծնած է | 1934 |
| Ծննդավայր | Արաք, Պարսկաստան |
| Մահացած է | 30 Մարտ 2021 (86 տարեկանին) |
| Մահուան վայր | Երեւան, Հայաստան |
| Քաղաքացիութիւն | Իրան, Հայաստան |
| Ազգութիւն | հայ |
| Մասնագիտութիւն | ազգային-հասարակական եւ կրթական գործիչ |
| Վարած պաշտօններ | «Ալիք» օրաթերթի գլխաւոր խմբագիր |
Կենսագրութիւն
ԽմբագրելՆորայր Էլսայեանը ծնած է 1934 թուականին Արաք քաղաքին մէջ։ Տարրական եւ միջնակարգ կրթութիւնը ստացած է իր ծննդավայրին մէջ, իսկ բարձրագոյն կրթութիւնը՝ Թեհրանի պետական համալսարանի պատմութեան ֆակուլտետին մէջ՝ մանկավարժական թեքումով։ Պատանի տարիքէն մասնակցած է հայ ազգային-հասարակական կեանքին, անդամագրուած է Հայ Յեղափոխական Դաշնակցութեան եւ իր ողջ կեանքի ընթացքին եղած է կուսակցութեան գաղափարներու անխոնջ կրողն ու հաւատարիմ զինուորը։
Գործունէութիւն
ԽմբագրելԻր բեղմնաւոր ազգային-հասարակական կեանքի ընթացքին եղած է Թեհրանի Հ.Մ. «Սիփան», «Ռոստոմ» եւ Հայ ուսուցիչներու միութեան հիմնադիր անդամներէն։ Երկար տարիներ զբաղած է մանկավարժութեամբ եւ նուիրուած՝ մատաղ սերունդի դաստիարակութեան գործին։ Որպէս հայոց լեզուի եւ պատմութեան ուսուցիչ, փոխտեսուչ եւ տեսուչ, պաշտօնավարած է Արաքի հայոց տարրական դպրոցին մէջ եւ Թեհրանի հայոց ազգային «Ռոստոմ», «Թունեան», «Նոր Անի» եւ «Աբրահամ Սողոմոնեան» դպրոցներուն մէջ։ Եղած է նաեւ Թեհրանի հայոց թեմի հայերէնագիտական երեկոյեան դասընթացքներու տեսուչ եւ հայոց պատմութեան դասախօս։
1984-1993, եղած է «Ալիք» օրաթերթի գլխաւոր խմբագիրը։
1993-95, բնակութիւն հաստատած է Հայաստան, ապա երեք տարիով վերադարձած է Թեհրան, որմէ ետք կրկին տեղափոխուած է Հայաստան եւ վերջնականապէս հաստատուած հայրենիքի մէջ՝ շարունակելով իր ազգային-հասարակական եւ գաղափարական-կուսակցական գործունէութիւնը։
2002 թուականին Լոս Անճելըսի Հ.Մ.Ը.Մ. Պըրպանքի «Սիփան» մասնաճիւղի նախաձեռնութեամբ, նշուած է անոր ազգային-հասարակական եւ կրթական գործունէութեան 50-ամեակը։ 2013 թուականին Հ.Մ. «Սիփան» միութեան 50-ամեակին առիթով, միութեան դահլիճը անուանակոչուած է Նորայր Էլսայեանի անունով՝ որպէս միութեան հիմնադիր անդամ։