Մեսրոպ Եպս. Սարգիսեան

Մեսրոպ Եպս. Սարգիսեան;
Ծնած է	1983
Ծննդավայր	Գամիշլի, Ալ-Կամիշլիի շրջան, Գամիշլի, Հասաքէ, Սուրիա
Քաղաքացիութիւն	Սուրիա
Կրօնք	Հայ Առաքելական Եկեղեցի
Մասնագիտութիւն	հոգեւորական
Աշխատավայր	Ա․Մ․Է եւ Քաթարի Հայոց Թեմի Առաջնորդ

Արաբական Միացեալ Էմիրութեանց (Ա․Մ․Է) եւ Քաթարի Հայոց Թեմի Առաջնորդ' Գերշ․ Տէր Մեսրոպ Եպս. Սարգիսեան:

Գերշ. Տ. Մեսրոպ Եպս. Սարգիսեան ընտրուեցաւ Թեմակալ Առաջնորդ Խմբագրել

Շաբաթ, 23 Նոյեմբեր 2019-ին, Արաբական Միացեալ Էմիրութեանց եւ Քաթարի թեմի Ազգային Երեսփոխանական Ժողովը Ազգային Առաջնորդարանին մէջ գումարեց արտակարգ նիստ մը, որուն ընթացքին Թեմիս Կաթողիկոսական Փոխանորդ Գերշ. Տ. Մեսրոպ Եպս. Սարգիսեան միաձայնութեամբ ընտրուեցաւ Թեմակալ Առաջնորդ։

Կաթողիկոսարանէն ու Դպրեվանքէն ներս վարած պաշտօնները Խմբագրել

Հայր Մեսրոպ կուսակրօն քահանայ ձեռնադրուած Է 2006–ին։

Մարտ 2013-ին Ն.Ս.Օ.Տ.Տ. Արամ Ա. Կաթողիկոս Կաթողիկոսական Փոխանորդ կը նշանակէ Հոգեշնորհ Մեսրոպ Եպս. Սարգիսեանը, Արաբական Էմիրութեանց ու Քաթարի շրջաններուն համար։ Նախքան այդ, Սրբազանը զանազան պաշտօններ վարած է Կաթողիկոսարանէն ու Դպրեվանքէն ներս։

11 Սեպտեմբեր 2017-ին Նորին Սրբութիւնը կատարեց միջ-եկեղեցական մարզէն ներս նշանակումը՝ Մեսրոպ Եպս. Սարգիսեան Արաբական Ծոցի շրջանի եկեղեցիներու խորհուրդի գործադիր վարչութեան անդամ։ Ան երկար տարիներ եղած է Նորին Սրբութեան գաւազանակիրը, դասատու՝ Մեծի Տանն Կիլիկիոյ Կաթողիկոսութեան Դպրեվանքէն ներս, Հայ Եկեղեցւոյ Համալասարանական Ուսանողներու Միութեան (Հ.Ե.Հ.Ո.Մ.) եւ Հայ Համալսարանաւարտներու Համախմբման (Հ.Հ.Հ.) հոգեւոր խորհրդատու, ինչպէս նաեւ Երիտասարդական Բաժանմունքի վարիչ։

Վեհափառ Հայրապետին տնօրինութեամբ, Մեսրոպ Եպս. Սարգիսեան նաեւ ուսանած է Լիբանանի պետական եւ Քասլիքի Ս. Հոգի (University of Holy Spirit in Kaslik) համալսարաններէն ներս։

«Մարդկային Եղբայրութիւն» Խորագրեալ Միջազգային Համագումար Խմբագրել

3 եւ 4 Փետրուար 2019-ին, կազմակերպութեամբ Արաբական Միացեալ Էմիրութեանց պետութեան եւ հովանաւորութեամբ Ֆրանչիսկոս Պապին ու Ալ-Ազհարի Շէյխ Դոկտ. Ահմատ Ալ Թայիպին, «Մարդկային եղբայրութիւն» թեմայով միջազգային համագումար մը տեղի ունեցաւ Ապու Տապիի մէջ։

Համագումարին Ն.Ս.Օ.Տ.Տ. Արամ Ա. Վեհափառ Հայրապետն ու Մեծի Տանն Կիլիկիոյ Կաթողիկոսութիւնը ներկայացուցին Թեհրանի Հայոց թեմի առաջնորդ Գերշ. Տ. Սեպուհ Արք. Սարգիսեանն ու Արաբական Միացեալ Էմիրութեանց եւ Քաթարի Թեմի Կաթողիկոսական փոխանորդ Գերշ. Տ. Մեսրոպ Եպս. Սարգիսեանը։

Նշենք, որ Վեհափառ Հայրապետը յատուկ պատգամ մը ղրկած էր համագումարին՝ ընդառաջելով համագումարի կազմակերպիչներու փափաքին։

Արաբական Ծոցի Երկիրներու Եկեղեցիներու Խորհուրդի Տարեկան Համաժողով Խմբագրել

Այս տարի հաւաքը տեղի ունեցաւ Յունուար 28-29, 2020, Քուէյթի մէջ, ուր Յոյն Ուղղափառ եկեղեցին հիւրընկալեց աւելի քան երեսուն եկեղեցական առաջնորդներ Ծոցի տարբեր երկիրներէն։ Յայտագիրը ընդգրկեց Խորհուրդը տարբեր աշխատանքներու տեղեկագիրը, եկեղեցական կեանքի մասին մանրամասնութիւններ, ինչպէս նաեւ՝ յատուկ աղօթք մատուցուեցաւ շրջանի եւ աշխարհի խաղաղութեան համար։

Հայկական ներկայութիւնը միշտ ալ եղած է աշխուժ այս Խորհուրդին մէջ։ Այս տարուան տարեժողով-հաւաքին իրենց մասնակցութիւնը բերին Արաբական Միացեալ Էմիրութիւններու եւ Քաթարի Հայոց Թեմի առաջնորդ՝ Գերշ.Տ. Մեսրոպ Եպս. Սարգիսեանը, Քուէյթի իւ շրջակայից Հայոց Թեմի առաջնորդ՝ կաթողիկոսական Փոխանորդ Հոգշ.Տ.Պետրոս Վրդ. Մանուէլեանը եւ հոգեւոր հովիւ Արժ.Տ.Արտակ Ա. Քհնյ. Քէհեայեանը եւ Արաբական Ծոցի Աստուածաշունչի Ընկերութեան Ընդհանուր Քարտուղար Դոկտ. Հրայր Ճէպէճեան

Խորհուրդը ունի նաեւ իր կեդրոնական վարչական ժողովը։ 2020 տարեշրջանի համար, կեդրոնական ժողովի ատենապետ ընտրուեցաւ Գերշ. Տ. Մեսրոպ Եպս.Սարգիսեանը։

Մեսրոպ Եպս. Սարգիսեան

Բովանդակութիւն

Գերշ. Տ. Մեսրոպ Եպս. Սարգիսեան ընտրուեցաւ Թեմակալ Առաջնորդ Խմբագրել

Կաթողիկոսարանէն ու Դպրեվանքէն ներս վարած պաշտօնները Խմբագրել

«Մարդկային Եղբայրութիւն» Խորագրեալ Միջազգային Համագումար Խմբագրել

Արաբական Ծոցի Երկիրներու Եկեղեցիներու Խորհուրդի Տարեկան Համաժողով Խմբագրել

Աղբիւրներ Խմբագրել