Բաբգէն Փափազեան
Բաբգէն Փափազեան ծնած է 28 Փետրուար 1915-ին, Պաղտատ, Իրաք։ Զաւակն է տոքթ. Գուրգէն եւ Փերուզ Փափազեաններու, որոնց յարկին տակ ստացած է իր նախնական ուսումը, առաջին ուսուցիչ ունենալով կուսակցական գործիչ եւ գրիչի մարդ իր հայրը։ Երկրորդական ուսումը ստացած է Պէյրութի նորաբաց Ճեմարանէն ներս աշակերտելով Լեւոն Շանթի եւ Նիկոլ Աղբալեանի։ «Նշան Փալանճեան» (այժմ Համազգայինի Մելանքթոն Եւ Հայկ Արսլանեան Ճեմարան) Ճեմարանի շրջանաւարտներու երրորդ սերունդէն էր ան 1937-ին։
| Բաբգէն Փափազեան | |
|---|---|
| Ծնած է | 28 Փետրուար 1915 |
| Ծննդավայր | Պաղտատ, Օսմանեան Կայսրութիւն |
| Մահացած է | 1990 |
Հետեւած է ֆրանսական բժշկութեան ճիւղին, միաժամանակ դասաւանդելով Ճեմարանի մէջ։ 1946-ին ընտանեօք վերադարձած է Պաղտատ, ուր մնացած է մինչեւ 1959, երբ վերջնականապէս հաստատուած է Պէյրութ շարունակելով կիրարկել բժիշկի իր ասպարէզը, ազգային եւ մշակութային գործունէութեան զուգահեռ։
Փափազեան աւելի քան 50 տարուան գործունէութիւն ունեցած է Հ. Յ. Դաշնակցութեան մէջ։ Ան գործած է Զաւարեան Ուսանողական Միութեան շարքերէն ներս եւ Պաղտատի մէջ բազմիցս եղած է ԼԿեդրոնական Կոմիտէի անդամ։
1963-1981ին եղած է Հ.Յ.Դ. Բիւրոյի անդամ, խմբագրած է «Ազդակ Շաբաթօրեակ», «Դրօշակ» պաշտօնաթերթը (1969-1977), ինչպէս նաեւ վարած է Երիտասարդական գրասենեակը։ 1955-էն ետք մասնակցած է Հ.Յ.Դ. Լիբանանի բոլոր Շրջանային եւ ընդհանուր ժողովներուն։
Հրատարակած է երեք հատոր՝ «Պատմութեան նենգափոխումը» (1968), «Թատերական արուեստ» եւ «Փիրանտելլօ»։ Թարգմանած է Ֆրանց Վերֆէլի «Մուսա Լերան քառասուն օրերը» վէպը։