Յովսէփ վրդ. Գալայճեան
Գերպ. Յովսէփ վրդ. Գալայճեան (ծնած՝ 1908, Քէֆէրտէզ), Տիթրոյթի Կաթողիկէ Հայ Համայնքի Հոգեւոր Հովիւ։
Յովսէփ Գալայճեան | |
---|---|
Ծնած է | 1908 |
Ծննդավայր | Քէֆէրտէզ, Խարբերդի Հարաւային Կողմը, Եփրատ Գետին մօտ |
Ազգութիւն | Հայ |
Կրօնք | Քրիստոնեայ |
Կենսագրութիւն Խմբագրել
Տիթրոյթի Կաթողիկէ Հայ Համայնքի Հոգեւոր Հովիւ Գերապայծառ Յովսէփ Վրդ. Գալայճեան ծնած է Քէֆէրտէզ գիւղը, Խարբերդի Հարաւային կողմը, Եփրատ գետին մօտ։ Հոն անցուցած է իր մանկութիւնը եւ յաճախած է գիւղին դպրոցը մինչեւ 1915-ի տեղահանութիւնը։
Իր մանկութեան երկրորդ շրջանը անցուցած է որբանոցներու մէջ. նախ Հալէպ, յետոյ Պալըքէսիր, Պարտիզակ եւ ապա 1918-ին Պոլիս: Նախ կը մնայ Շիշլիի որբանոցը յետոյ կը յաճախէ Սէն ժորժ. աւելի վերջը՝ Գատըգիւղի Մխիթարեան վարժարանը մինչեւ 1921: Նոյն տարին Հռոմ կը մեկնի 11 այլ մանուկներու հետ եւ 10 տարի կ՛աշակերտէ Լեւոնեան Ժառանգաւորացին։
Իքր Համալսարանական ուսումը ստացած է լատիներէն լեզուով, նախ Հռոմի Ուրբանեան Համալսարանին մէջ, ուր հետեւած է փիլիսոփայութեան, յետոյ 1927-31 յաճախած է Գրիգորեան (կրէկորիանոս) համալսարանը, եւ աստուածաբանական ճիւղէն՝ Դոկտորի տիտղոս։
1931-ին Հռոմի Ս. Նիկողայոս Եկեղեցիին մէջ քահանայ կը ձեռնադրուի։ Տարի մը Լեւոնեան Ժառանգաւորացի մէջ դասաւանդըլէ ետք կը մեկնի Պէյրութ եւ Հայ Կաթողիկէ Պատրիարքարանին մէջ կը ստանձնէ Քարտուղար-Դիւանապահի պաշտօնը։ Ազատ ժամերուն կը յաճախէ Լիբանանի Երաժշտանոցը, 7 տարի. յետոյ երեք տարի ալ երքեհոնի դասեր կ՛առնէ Ամերիկեան Երաժշտանոցի տեսուչէն. միեւնոյն ատեն կը հետեւի ձայնապարզութեան։ Պէյրութի մէջ կը կազմէ «Կիլիկիա» երգչախումբը եւ համերգներ կը սարքէ տասը տարի։ Դասաւանդած է Հայ Քոյրերու վարժարանին մէջ։
1946-ին ֆիլատելֆիա կը Հրաւիրուի Կարտինալ Աղաճանեանին կողմէ, որպէս եկեղեցւոյ օգնական Հովիւ։ Հոն կը կազմէ Կոմիտաս երգչախումբը եւ համերգներ կը կազմակերպէ։ 1948-ին Տիթրոյթ կու գայ, ուր կը կազմէ երգչախումբ մը. նաեւ կը կատարէ Հրատարակչական աշխատանք։ Գերապայծառութեան տիտղոսին կ՛արժանանայ 1973-ին, ձեռամբ Գերապայծառ Երուանդ Թ.Ծ.Վ. Գորտիկեանի։ Սոյն տիտղոսը իրեն նուիրուած էր Սրբազան Քահանայապետ Պօղոս Զ.ի կողմէ։
Գործերը Խմբագրել
Իր հրատարակուած գործերն են.
- «Փունջ Երգեր» (քերթուածներ ի յիշատակ Մեծ Եղեռնի Հայ Նահատակներուն, Ս. Ղազար Վենետիկ, 1965)։
- «Կոմիտաս Վրդ.ի ծննդեան 100-ամեակին առթիւ (գրքոյկ, 1969)։
- «In My Solitude» (քերթուածներ, անգլերէն, 1972)։
- «Կենսագրութիւն Յ. Նազլեան Արքեպիսկոպոսի (Վենետիկ, 1973)։
- «Գեր. Յովսէփ Վրդ. Գալայճեանի Կեանքն ու Գործը» (իր քահանայութեան 50-ամեայ յոբելեանին առթիւ. կը պարունակէ նաեւ իր յօրինած ու դաշնաւորուած քառաձայն խմբերգները, Տիթրոյթ, 1982)։
- «Մեներգներ եւ Մշակումներ (Տիթրոյթ, 1984)։
- «Մտածումներ»։
- «Դատումներ»։
- «Գնահատումներ» (Տիթրոյթ, 1987)։
- «Մտքի Կայծեր (Լոս Անճելըս, 1987, անգլերէնի թարգմանուած)։
- «Յուշեր Հայ Որբի մը Մանկութեան օրերէն»։
- «Ականատեսի Վկայութիւններ Եղեռնէն» (Լոս Անճելըս, 1989)։
- «Քառաձայն Խմբերգներ»։
- «Աստուածամօր Նուիրուած Շարականնրու» (Տիթրոյթ, 1989):
Ութը տարի լոյս ընծայած է «Վարդենիք» պարբերաթերթը (1950-1958): Աշխատակցած է Լիբանանի «Ազդակ» եւ «Եփրատ» թերթերուն եւ «Աւետիք» ամսագրին։
Հայր Յովսէփ Գալայճեան՝ իր մանկութենէն, հարազատ պատկերներ կ՛արտայայտէ[1]։
Ծանօթագրութիւններ Խմբագրել
- ↑ Սփիւռքահայ արդի գրականութիւն (խմբ. խմբագրող և համադրող՝ Սեդա Ծաղիկեան-Տէմիրճեան), Միշիկըն էջ էջ 706-707։