Ալեքսան Մնակեան
Ալեքսան Մնակեան (10 Նոյեմբեր 1936, Պուրճ Համուտ, Մաթնի շրջան, Լեռնային Լիբանանի նահանգ, Լիբանան - 1986), սփիւռքահայ երաժիշտ, խմբավար։ Ալեքս եղած է ոչ միայն Լիբանանի, այլ Միջին Արեւելքի լաւագոյն աքորտէոնիստը ձեռնադաշնակ նուագողը:
| Ալեքսան Մնակեան | |
|---|---|
| Ծնած է | 10 Նոյեմբեր 1936 |
| Ծննդավայր | Պուրճ Համուտ, Մաթնի շրջան, Լեռնային Լիբանանի նահանգ, Լիբանան |
| Մահացած է | 1986 |
| Քաղաքացիութիւն |
 Լիբանան |
| Մասնագիտութիւն | երաժիշտ |
Կեանք եւ գործունէութիւն Խմբագրել
Ծնած է Պուրճ Համուտ (Լիբանան)։ Սկսած է նուագելու 1952-ին՝ քաջալերուած Հ. Գրիգորիս Հեպոյեանի կողմէ։ 1955-1957 ելոյթներ ունենած է Հալէպի, Պաղտատի, Լիբանանի, Թեհրանի, Պոլսոյ եւ Կիպրոսի մէջ։
1957-1959 Միլանոյի մէջ (Իտալիա) կատարելագործած է իր երաժշտական գիտութիւնը՝ աշակերտելով «Maestro Fugazza»-ի, ստացած է միջազգային բազմաթիւ մրցանակներ։
1959-ին վերադարձած է Լիբանան, ուր իբրեւ ձեռնադաշնակի վարպետ նուագած է Լիբանանի Պետական Ռատիոկայանի նուագախումբին մէջ ու դասաւանած՝ Պետական Երաժշտանոցին մէջ։
1975-ին իբրեւ գեղարուեստական պատասխանատու ընկերակցած է Համազգայինի պարախումբին, որ կը մասնակցէր ՔՈՆՖՈԼԱՆ-ի (Ֆրանսա) միջազգային փառատօնին[1]։ 1977-ին նոյն խումբին հետ ելոյթներ կ՚ունենայ Քուէյթ եւ Պարսկաստան։ 1978-ին Ծնծղայ մանկական երգչախումբի երգացանկի պատրաստութեան, եղանակներու դաշնաւորման ու գործիքաւորման աշխատանքը կատարած է։
1980-ին ղեկավարած է «ՆԱՆՕՐ» մանկապատանեկան երգչախումբը եւ Հ.Յ.Դ. Պատանեկան միութիւններու երգչախումբը։
1981-ին գեղարուեստական պատասխանատու եղած է Համազգայինի «ՆԱՆՕՐ» պարախումբին, իսկ 1983-ին գեղարուեստական պատասխանատու՝ Համազգայինի պարախումբին։
Ալեքսան Մնակեան իր գործուն մասնակցութիւնը բերած է նաեւ լիբանանահայկական եւ լիբանանեան բազմաթիւ ձեռնարկներու իբրեւ յօրինող, դաշնաւորող, նուագող եւ խորհրդատու։ Ան իր ուրոյն յօրինումներով եւ երաժշտական վաստակով կարեւոր տեղ գրաւած է Րահպանիներու աշխարհին մէջ[2][3]։
8 Մայիս 2011-ին, Ալեքսան Մնակեանի ծննդեան 75 եւ մահուան 25-ամեակներուն առիթով, Համազգայինի Լիբանանի Շրջանային Վարչութեան «Կարկաչ» մանկական եւ պատանեկան երգչախումբը Մնականեանին նուիրուած համերգին փակումը կատարեց անոր «Արտուտիկ» 12 մանկապատանեկան երգերու[4] կատարողութեամբ[5]:
Ալեքս մահացաւ Քանատայի մէջ, 1986-ի Ապրիլին:
Ծանօթագրութիւններ Խմբագրել
- ↑ «Ալեքսան Մնակեան (1936-1986)»
- ↑ «Արաբական աշխարհի մեծն Ֆէյրուզը 81 տարեկան է»
- ↑ «Արաբական աշխարհի թաւշեայ ձայնը 81 տարեկան է»
- ↑ «ԼԻԲԱՆԱՆԱՀԱՅ ԳԻՐՔԸ, 1894-2012, ՄԱՏԵՆԱԳԻՏԱԿԱՆ ՑԱՆԿ»։ արխիւացուած է բնօրինակէն-էն՝ 2016-09-10-ին։ արտագրուած է՝ 2016-12-21
- ↑ ««Կարկաչ» մանկապատանեկան երգչախումբի համերգը նուիրուած՝ Ալեքսան Մնակեանի ծննդեան 75 եւ մահուան 25-ամեակներուն (Լիբանան)»