Բիւզանդ Եղիայեան

Բիւզանդ Եղիայեան (1900, Ատանա, Ատանայի վիլայէթ, Օսմանեան Կայսրութիւն - 1995), հայ գրող, խմբագիր եւ հրապարակագիր։

Բիւզանդ Եղիայեան
Ծնած է	1900
Ծննդավայր	Ատանա, Ատանայի վիլայէթ, Օսմանեան Կայսրութիւն
Մահացած է	1995
Քաղաքացիութիւն	Օսմանեան Կայսրութիւն
Մասնագիտութիւն	քաղաքական գործիչ

Կենսագրութիւն

Հանրային, կրթական, մշակութային ու գրական բազմակողմանի իր ծառայութիւններով երախտաշատ մշակ մը՝ Բիւզանդ Եղիայեան, ծնած է Ատանա (կիլիկիա), ուր եւ ստացած է իր նախակրթութիւնը։ Երկրորդական եւ բարձրագոյն ուսման հետեւած է Տարսոնի եւ Զմիւռնիոյ ամերիկեան գոլէճներուն, Աթէնքի կրօնից Վարժարանին, Ժընեւի Institut Universitaire de Hautes Études Internationalesի եւ Պըրմինկհամ-Վուտրպրութի (Անգլիա) Sally Oak գոլէճին մէջ, մասնագիտանալով մանկավարժական, աստուածաբանական, միջազգային-օրէնսգիտական եւ քաղաքական - տնտեսութեան ճիւղերուն մէջ։ Տեսչական եւ ուսուցչական պաշտօններ վարած է Քրաֆթ Պոնառի՝ Զուիցերիոյ Հայասէրներու Ընկերութեան հովանաւորած «Հայ Դպրոց»ին, Կիլիկիոյ Հայոց Կաթողիկոսութեան Անթիլիասի դպրեվանքին, Պէյրութի «Դարուհի Յակոբեան» եւ «Յովակիմեան-Մանուկեան» երկրորդ. վարժարաններուն եւ Կիպրոսի Մելգոնեան կրթական հաստատութեան մէջ, իբրեւ դասախօս գրական, հայագիտական, պատմագիտական, իմաստասիրական եւ մանկավարժական նիւթերու։

Աւելի քան յիսնամեայ իր գործունէութիւնը, մասնաւորաբար Միջին Արեւելքի հայահոծ գօտիներուն մէջ, կ'ընդգրկէ առաւելապէս կրթական-դաստիարակչական դերակատարութեամբ։

Գործերը

«Սփիւռք» (պատմուածքներ), «Արդի Հայ Գրականութեան», «Մանկութեան Պարտէզ», «Կարաւանը», «Մարդու Օրերը» (պատմուածքներ), «Լուսակամար Հայ Գրականութեան», «Փոքր Ածու» (բանաստեղծութիւններ), «Տրդատ Մեծ», «Վասակ Մարզպան», «Որդի Մարդոյ», «Դաւիթ եւ Մելիք» (թատերգութիւններ):

Իր խառնուածքով եւ մտաւորականի անհատականութեամբ՝ Բ. Եղիայեան կ'անձնաւորէ դասական ուսուցիչը, աւանդապաշտ գրագէտը եւ գիրի ու մշակոյթի բոլորանուէր սերմնացանը: